Ukrayna kollecə hücum etdi, ölən və yaralılar var - YENİLƏNİB

Xilasedicilər Ukrayna Silahlı Qüvvələrinin hücumuna məruz qalmış Luqansk Xalq Respublikasının Starobilsk şəhərində kollec yataqxanasının dağıntıları altından ölmüş tələbənin cəsədini çıxarıblar.

E-huquq.az xəbər verir ki, bu barədə Rusiya Fövqəladə Hallar Nazirliyi məlumat yayıb.

Bildirilib ki, daha 3 nəfərin yeri dağıntılar altında müəyyənləşdirilib.

***

Ukrayna Silahlı Qüvvələri Luqansk Xalq Respublikasındakı Starobilsk Peşə Kollecinin məktəb binasına və yataqxanasına pilotsuz uçuş aparatları ilə hücum edib.

E-huquq.az xəbər verir ki, bu barədə Luqansk Xalq Respublikasının rəhbəri Leonid Paseçnik məlumat yayıb.

O bildirib ki, hücum zamanı binada 14-18 yaş arası 86 uşaq olub, onlardan 35-i müxtəlif dərəcəli xəsarətlər alıb.

Dağıntılar altında qalan 2 nəfər xilas edilib.

Axtarış-xilasetmə işləri davam etdirilir.

Paseçnikin sözlərinə görə, şəhərdə inzibati binalar, mağazalar və fərdi evlər də zərər görüb.

Humay Eminqızı