Məktəblərdə rəqəmsal cihazlardan istifadə təhsilin keyfiyyətinə təsir edir

Məktəblərdə rəqəmsal cihaz istifadəsi təhsilin keyfiyyətinə təsir edir.

E-huquq.az xarici KİV-ə istinadən xəbər verir ki, məktəblərdə yalnız şəxsi mobil telefonların qadağan edilməsi akademik nəticələrin yaxşılaşması üçün kifayət hesab edilmir. Mütəxəssislər bildirirlər ki, siniflərdə nəzarətsiz şəkildə istifadə olunan planşet və kompüterlər də şagirdlərin öyrənmə qabiliyyətinə mənfi təsir göstərə bilər.

Məlumata görə, ABŞ-də dövlət məktəblərinin əksəriyyəti şagirdləri rəqəmsal cihazlarla təmin edir. Lakin yalnız şəxsi telefonların dərs mühitindən çıxarılması gözlənilən akademik uğuru təmin etmir.

Ekspertlərin fikrincə, məktəblərdə verilən kompüterlər çox vaxt fərdi cihazları əvəz edir və tədris prosesinə təsir göstərir. Beynəlxalq standartlaşdırılmış test nəticələrinin təhlili isə göstərir ki, kompüter istifadəsinin artması ilə şagirdlərin akademik göstəricilərində azalma müşahidə olunur.

Bildirilib ki, texnologiyanın təqdim etdiyi hazır məzmun siniflərdə interaktiv ünsiyyəti və dərin müzakirə mühitini zəiflədir. Bir çox hallarda müəllimlər fəal tədris əvəzinə şagirdləri rəqəmsal platformalar üzərindən tapşırıqları yerinə yetirməyə yönləndirirlər.

Pedaqoqların ekran vaxtını məhdudlaşdırmağı tövsiyə etməsi ilə yanaşı, məktəbdə uzun müddət rəqəmsal cihazlardan istifadə edilməsinin ziddiyyət yaratdığı qeyd olunur. Mütəxəssislər bildirirlər ki, davamlı ekran istifadəsi şagirdlərdə yorğunluq, stress və motivasiya azalmasına səbəb ola bilər.

Araşdırmalara əsasən, çap materiallarından istifadə edən şagirdlərin məlumatı daha yaxşı qavradığı, əl ilə qeydlər aparanların isə yadda saxlama qabiliyyətinin daha yüksək olduğu qeyd edilir.

Bundan əlavə, rəqəmsal cihazlarda sürətli məzmun və oyunların yaratdığı ani mükafat sistemi uşaqlarda diqqət müddətinin qısalmasına səbəb ola bilər ki, bu da dərin düşünmə və oxu vərdişlərini çətinləşdirir.

Məktəblərdə həddindən artıq ekran istifadəsinin təkcə psixoloji deyil, həm də fiziki təsirləri olduğu bildirilir. Belə ki, oturaq həyat tərzi və uzunmüddətli ekran istifadəsi uşaqlarda görmə problemləri riskini artırır.

Eyni zamanda, məktəb kompüterləri vasitəsilə yaşa uyğun olmayan məzmunlara çıxış və kiber təhlükələrə məruz qalma risklərinin də mövcud olduğu vurğulanır.

Mütəxəssislər hesab edirlər ki, rəqəmsal savadlılıq vacib olsa da, oxu, yazı və riyaziyyat kimi əsas bacarıqların qələm-kağız üsulu ilə də öyrədilməsi tədris keyfiyyəti baxımından mühüm əhəmiyyət daşıyır.

Şəbnəm Mehdizadə