Tətil səbəbindən Belçikada hava nəqliyyatının hərəkəti dayandırılıb

Hava nəqliyyatı dispetçerlərinin tətili səbəbindən Belçikada bütün uçuşlar ləğv edilib.

E-huquq.az xarici KİV-ə istinadən xəbər verir ki, Brüssel Hava Limanından verilən açıqlamada, Belçika hava məkanını tənzimləyən orqan olan "Skeyes" işçilərinin bu gün saat 14:00 ilə 21:00 arasında elan edilməmiş tətil elan edildiyi bildirilib.

Bəyanatda, dispetçerlərin qəfil, icazəsiz tətili səbəbindən Belçika hava məkanında hava nəqliyyatının mümkün olmadığı bildirilib.

"Buna görə də aviaşirkətlər planlaşdırılan bütün uçuşlarını ləğv etmək məcburiyyətində qalıblar", - deyə məlumatda qeyd olunub.

Bu saatlarda uçuşları olan sərnişinlərə hava limanına gəlməmək tövsiyə edilib.

Bəyanatda hava nəqliyyatının saat 21:00-dan sonra bərpa olunacağı və aviaşirkətlər tərəfindən əlavə məlumatın açıqlanacağı qeyd edilib.

Şarlerua Hava Limanı da vəziyyətlə bağlı açıqlama verərək, "Skeyes" hava nəqliyyatı dispetçerlərinin səhər 6:30 ilə 9:30 arasında keçirdiyi və çoxsaylı uçuşların ləğv edilməsi ilə nəticələnən əvvəlki tətilindən sonra yeni bir tətilin başladığını və əməliyyatların dayandırıldığını bildirib.

Bəyanatda qeyd olunub ki, bütün uçuşlar saat 14:15-dən etibarən ləğv edilib. Sərnişinlərdən geri ödəmə və ya yenidən bron üçün aviaşirkətləri ilə əlaqə saxlamaları xahiş olunub.

Saat 21:00-dan sonra uçuşları olan sərnişinlərə uçuşlarının vəziyyətini aviaşirkətlərin veb saytlarında yoxlamaq tövsiyə olunub.

Qeyd edək ki, hava hərəkəti dispetçerləri gələn ildən etibarən "Lieg"e və "Charleroi" hava limanlarının nəzarətinin Namurdakı yeni rəqəmsal mərkəzə köçürülməsi prosesini tənqid edirlər. İşçilər yeni sistemin tətbiqi ilə bağlı yarana biləcək iş şəraiti, işçi heyətinin səviyyəsi, təlim və iş yükü ilə bağlı potensial problemlərə etiraz edirlər.

Şəbnəm Mehdizadə