Süni intellekt dələduzluğu ötən il dünyaya 442 milyard dollara başa gəlib

Süni intellekt dələduzluğu ötən il dünyaya 442 milyard dollara başa gəlib.

E-huquq.az xarici KİV-ə istinadən xəbər verir ki, bu barədə INTERPOL tərəfindən dərc edilən hesabatda bildirilir.

Agentlik ümumi risk səviyyəsini "yüksək" olaraq təsnif edərək, növbəti 3-5 ildə əhəmiyyətli dərəcədə artacağını proqnozlaşdırır.

ABŞ-da FTB-nin İllik İnternet Cinayətləri Şikayətləri Mərkəzi Hesabatında kibercinayətkarlıqla bağlı 20,9 milyard dollarlıq itki qeydə alınıb. Hesabat tarixində ilk dəfə olaraq FTB süni intellektlə bağlı şikayətləri ayrıca cinayət kateqoriyası kimi qəbul edərək, 893 milyon dollardan çox itki bildirən 22 000-dən çox şikayəti qeydə alıb.

Böyük Britaniyada qurbanların əl ilə pul göndərməsi ilə bağlı dələduzluq 19% artaraq 576,4 milyon funt sterlinqə çatıb.

Süni intellektin reallıqla uydurma arasındakı sərhədləri qarışdırmaq qabiliyyəti kibercinayətkarlara ucuz və effektiv bir texnologiya təqdim edir. ABŞ hakimiyyət orqanlarının hərəkətə keçməsinə səbəb olan yeni nəsil dələduzluq metodlarında cinayətkarlar ailə üzvlərini təqlid etmək üçün onlayn satılan ucuz süni intellekt səs klonlama vasitələrindən istifadə edirlər.

Rəqəmsal kriminalistika üzrə mütəxəssis, Kaliforniya Universitetinin professoru Hani Farid süni intellekt tərəfindən yaradılan səsləri və videoları real səslərdən ayırd edə bilmədiyini bildirib.

O qeyd edib ki, normal insanların süni intellekt səslərini ayırd etmək qabiliyyəti təxminən 60 faizdir.

Şəbnəm Mehdizadə