İsveçrədə ABŞ və İran arasında danışıqlar dayandırıldı - YENİLƏNDİ

ABŞ və İran arasında imzalanması nəzərdə tutulan memorandumla bağlı İsveçrədə keçirilən dördtərəfli danışıqlar 80 dəqiqəlik müzakirələrdən sonra dayandırılıb.

E-huquq.az xəbər verir ki, bu barədə İranın Fars agentliyi məlumat yayıb.

Agentliyin məlumatına görə, fasilə nümayəndə heyətlərinin öz daxilində əlavə məsləhətləşmələr aparmasına ehtiyac yaranması ilə əlaqədardır.

***

19:52

İsveçrədə Pakistan və Qətərin vasitəçiliyi ilə davam edən İran-ABŞ danışıqlarına daxili məsləhətləşmələrin aparılması məqsədilə fasilə verilib.

E-huquq.az xəbər verir ki, bu barədə “Fars” Agentliyi məlumat yayıb.

Nümayəndə heyətlərinin bu fasilədən istifadə edərək öz paytaxtları ilə əlaqə saxlaması və son inkişaflarla bağlı fikir mübadiləsi aparması gözlənilir.

İran Xarici İşlər Nazirliyinin və danışıqlar üzrə nümayəndə heyətinin sözçüsü İsmayıl Bəqai bildirib ki, fasilədən sonra görüşlər yenidən davam etdiriləcək. Onun sözlərinə görə, danışıqların Türkiyə vaxtı ilə saat 20:00-da başa çatması gözlənilir.

Qeyd edək ki, danışıqlarda ABŞ nümayəndə heyətinə Vitse-prezident Cey Di Vens, İran nümayəndə heyətinə ölkə parlamentinin sədri Məhəmməd Baqir Qalibaf başçılıq edir.

***

16:42

Qətər Xarici İşlər Nazirliyi danışıqların başladığını və ABŞ, İran və Pakistan nümayəndələrinin iştirakı ilə yüksək səviyyəli komitənin ilk iclasının keçirildiyini elan edib.

E-huquq.az xəbər verir ki, bu barədə Qətər XİN bəyanat yayıb.

"Qətər dövləti, Amerika Birləşmiş Ştatları, İran İslam Respublikası və iki vasitəçi ölkənin - Qətər dövləti və Pakistan İslam Respublikasının nümayəndələrinin iştirakı ilə zirvə görüşünün başladığını elan edir", - deyə məlumatda qeyd olunub.

Rəsmi Doha ümid etdiyini bildirib ki, bu görüşlər ABŞ və İran arasında anlaşma memorandumunda nəzərdə tutulan bütün aspektləri əhatə edən hərtərəfli və davamlı bir razılaşmanın əldə olunmasına gətirib çıxaracaq.

Qətər Xarici İşlər Nazirliyinin sözçüsü Məcid bin Məhəmməd əl-Ənsari tərəflərin yekun razılaşmanın bəndlərini müzakirə etmək üçün ixtisaslaşmış texniki qruplar yaratdıqlarını bildirib. Diplomatın sözlərinə görə, bu, bütün tərəflərin danışıqlar prosesinin xoşməramlı şəkildə irəliləməsinə sadiqliyini əks etdirir.

Əl-Ənsari həmçinin Pakistanın tərəfdaş və vasitəçi kimi rolunu, Vaşinqton və Tehranın diplomatik həllərə sadiqliyini və Misir, BƏƏ, Səudiyyə Ərəbistanı və Türkiyənin danışıqlar prosesinə verdiyi dəstəyi yüksək qiymətləndirib.

***

Hazırda İran, ABŞ və Qətər nümayəndələri arasında üçtərəfli görüş başlayıb.

E-huquq.az xəbər verir ki, bu barədə IRIB məlumat yayıb.

Görüşdə Livanda atəşkəs və İran aktivlərinin blokdan çıxarılması müzakirə olunur.

İsveçrənin Bürgenstok kurort zonasındakı danışıqlarında İran nümayəndə heyəti memorandumun beş bəndinin həyata keçirilməsinə nail olmağa çalışır, lakin qalan üç bənd barədə məlumat verilməyib.

Qeyd edək ki, İran Livanda atəşkəs elan olunana qədər ABŞ ilə sanksiyalar və İranın nüvə proqramı ilə bağlı yeni danışıqlara başlamayacağını bəyan edib.