İspaniyada meşə yanğınları: 500 nəfər təxliyə edilib - FOTO

İspaniyanın Valensiya Muxtar Bölgəsində baş verən meşə yanğınları səbəbindən Kastellon əyalətində təxminən 500 nəfər ehtiyat tədbiri olaraq təxliyə edilib.

E-huquq.az xarici KİV-ə istinadən xəbər verir ki, alovların söndürülməsi üçün genişmiqyaslı yerüstü və hava əməliyyatları davam edir. Ölkə hazırda yayın ikinci istilik dalğasının yaratdığı əlverişsiz hava şəraiti fonunda bir neçə bölgədə meşə yanğınları ilə mübarizə aparır. Son günlər davam edən yanğınlar xüsusilə Valensiya regionunda ciddi təhlükə yaradıb.

Yanğınlar Kastellon əyalətinin Soneja və Azuebar rayonlarına yaxın əraziləri əhatə edir. Səlahiyyətlilər alovların yaşayış məntəqələrinə yaxınlaşması səbəbindən təxminən 500 nəfərin təhlükəsiz ərazilərə köçürüldüyünü açıqlayıb.

Valensiya Muxtar Hökuməti yanğınların söndürülməsi üçün təxminən 200 nəfərlik canlı qüvvə və 15 hava vasitəsinin cəlb olunduğunu bildirib. Komandalar alovların yayılmasının qarşısını almaq üçün fasiləsiz şəkildə həm qurudan, həm də havadan müdaxilə edir.

İspaniya Hərbi Fövqəladə Hallar Bölməsi (UME) də əməliyyatlara dəstək verir. Məlumata görə, bölgədə 50 hərbçi və 17 texnika aktiv şəkildə yanğınsöndürmə işlərinə cəlb olunub.

Yanğınlardan əvvəl Kataloniya, Araqon, Asturiya, Əndəlüs və Qalisiya bölgələrində də bir sıra kiçik və orta miqyaslı meşə yanğınları qeydə alınmışdı. Rəsmilər bildirirlər ki, yüksək temperatur və aşağı rütubət ölkənin böyük hissəsində yanğın riskini kritik səviyyəyə yüksəldib.

İspaniya Mülki Müdafiə Agentliyi Kataloniyada Girona və Lleida ərazilərində bəzi təbiət parklarının müvəqqəti olaraq ziyarətə bağlandığını açıqlayıb. Qərarın məqsədi yeni yanğınların qarşısını almaq və mümkün təxliyə proseslərini təhlükəsiz şəkildə həyata keçirməkdir.

Meteoroloji xidmətlərin məlumatına görə, bəzi bölgələrdə temperatur 42°C-ni keçib və ikinci istilik dalğasının 10 iyula qədər davam edəcəyi gözlənilir. Mütəxəssislər yüksək temperatur, quraqlıq və güclü küləklərin yanğın riskini artırdığını bildirərək əhaliyə ehtiyatlı olma çağırışı ediblər.

Şəbnəm Mehdizadə