Tarlada tapılan min illik sirli üzük alimləri heyrətləndirdi

İngiltərənin Linkolnşir bölgəsində həvəskar metal detektorla axtarış aparan 49 yaşlı Rafal Vesolovski tarixə işıq salan nadir artefakt aşkar edib. Gümüş və qızıl örtüklü üzük üzərindəki sirli runik yazılar bu günədək tam şəkildə deşifrə olunmayıb.

E-huquq.az xarici KİV-ə istinadən xəbər verir ki, Vesolovski 2024-cü ilin may ayında tarlada axtarış zamanı cihazdan gələn qeyri-adi siqnalı izləyib. Qazıntı nəticəsində üzə çıxan tapıntının adi metal parçası olmadığını anlayan tədqiqatçı, min ildən artıq müddət ərzində torpaq altında qorunmuş qiymətli artefaktla qarşılaşdığını bildirib.

Mütəxəssislərin araşdırmasına əsasən, üzük təxminən VIII-X əsrlər arasındakı dövrə aid edilir. Artefaktın üzərində soldan sağa düzülmüş 16 runik simvol yerləşir. Yazının mənası hələ də tam müəyyən edilməsə də, Nottinqem Universitetinin tədqiqatçıları onun “Udnan” adlı bir şəxslə əlaqəli ola biləcəyini ehtimal edirlər.

Alimlər yazının “Udnanın üzüyü” kimi şərh edilə biləcəyini qeyd etsələr də, bu versiya hələlik təsdiqlənmiş elmi nəticə hesab olunmur. Runik işarələrin dəqiq mənasının müəyyənləşdirilməsi üçün araşdırmalar davam etdirilir.

Tapıntının əhəmiyyəti yalnız üzüyün öz sirri ilə məhdudlaşmır. Artefaktın aşkar edildiyi ərazidə son Anglo-Sakson dövrünə aid başqa bir əşyanın tapılması burada əvvəllər məlum olmayan erkən orta əsr yaşayış məntəqəsinin mövcud ola biləcəyini göstərir.

Arxeoloq Dr. Lisa Brundle hesab edir ki, bu tapıntılar bölgədə yüksək statuslu və savadlı bir elit təbəqənin yaşadığını göstərən mühüm sübutlar ola bilər.

Tədqiqatçıların fikrincə, nadir üzük həmin dövrdə yalnız bəzək əşyası kimi deyil, sahibini qoruduğuna inanılan simvolik talisman kimi də istifadə edilmiş ola bilər. Hazırda artefakt üzərində aparılan araşdırmalar onun mənşəyi və üzərindəki sirli yazının həqiqi mənasını üzə çıxarmağa yönəlib.

Şəbnəm Mehdizadə