Çində qayalığın zirvəsində market - Məhsullar iplə daşınır - FOTO

Çinin Hunan əyalətində yerləşən Şiniuzhai Təbiət Parkında 120 metr hündürlükdəki qayalığın üzərində fəaliyyət göstərən kiçik market qeyri-adi yerləşməsi ilə diqqət çəkir.

E-huquq.az xarici KİV-ə istinadən xəbər verir ki, alpinistlərin dırmaşma zamanı ehtiyaclarını qarşılamaq üçün yaradılan satış məntəqəsi dünyanın ən çətin əlçatan marketlərindən biri hesab olunur.

2018-ci ildə istifadəyə verilən market Şiniuzhai Təbiət Parkındakı təxminən 800 metrlik via ferrata (dəmir konstruksiyalı dırmanma marşrutu) üzərində yerləşir. Zirvəyə doğru təxminən 90 dəqiqə davam edən marşrut zamanı alpinistlər burada qısa fasilə verərək su və qəlyanaltı ala bilirlər.

Marketin fəaliyyəti isə kifayət qədər çətin şəraitdə təşkil olunur. İşçilər hər gün onlarla kiloqram su və ərzağı qayaya dırmaşaraq və bəzi hallarda iplərdən istifadə etməklə satış məntəqəsinə çatdırırlar. Burada satılan içkilərin qiymətinin 1 ABŞ dollarından aşağı olduğu bildirilir.

Şiniuzhai Təbiət Parkının baş meneceri Sonq Huicjounun sözlərinə görə, marşrutu uğurla başa vuran hər bir alpinistə pulsuz bir şüşə su təqdim olunur.

Qeyri-adi memarlığı və əməkdaşlarının çətin şəraitdə fəaliyyəti sayəsində market sosial şəbəkələrdə dəfələrlə geniş maraq doğurub və parkın simvollarından birinə çevrilib.

Şiniuzhai Təbiət Parkı rejissor Ceyms Kemeronun "Avatar" filmindəki üzən dağlara ilham verdiyi bildirilən Çinin məşhur Canqjiajie Milli Meşə Parkının yaxınlığında yerləşir.

Həm ekstremal idman həvəskarları, həm də turistlər üçün maraqlı məkan hesab olunan bu market təbiətin sərt şəraiti ilə insan əməyinin vəhdətini nümayiş etdirən qeyri-adi layihələrdən biri kimi qiymətləndirilir.

Şəbnəm Mehdizadə