Venesuelada zəlzələlərdə ölənlərin sayı 3 811 nəfərə çatıb

İyunun 24-də Venesuelada baş verən iki güclü zəlzələ nəticəsində həyatını itirənlərin sayı 3811 nəfərə yüksəlib.

E-huquq.az xarici KİV-ə istinadən xəbər verir ki, bu barədə Venesuela Milli Assambleyasının sədri Xorxe Rodriges paytaxt Karakasda keçirdiyi mətbuat konfransında məlumat verib.

Onun sözlərinə görə, son açıqlamadan sonra ölənlərin sayı daha 126 nəfər artaraq 3 811-ə, yaralananların sayı isə 16 740-a çatıb.

Rodriges bildirib ki, zəlzələlər nəticəsində 17 907 nəfər evsiz qalıb.

Milli Assambleya sədrinin sözlərinə görə, hazırda ölkədə 4 388 nəfərdən ibarət beynəlxalq axtarış-xilasetmə qrupu fəaliyyət göstərir. Silahlı qüvvələr, polis, bələdiyyələr, yanğınsöndürmə xidmətləri və mülki müdafiə qurumlarının əməkdaşları da daxil olmaqla ümumilikdə 30 076 nəfər fəlakət bölgəsində iş aparır.

Venesuelanın təhsil naziri Hektor Rodriges isə hökumətin yaratdığı 87 müvəqqəti sığınacaqda azı 16 686 nəfərin yerləşdirildiyini açıqlayıb.

Xatırladaq ki, iyunun 24-də Venesuelada 39 saniyə fərqlə 7,2 və 7,5 maqnitudalı iki güclü zəlzələ qeydə alınıb.

Şəbnəm Mehdizadə