Qrenlandiyada nəhəng aysberqin parçalanma anı kameraya düşüb - FOTO

Qrenlandiyanın İlulissat bölgəsində nəhəng aysberqin parçalanaraq dənizə çökdüyü an tur gəmisində olan sərnişinlər tərəfindən lentə alınıb.

E-huquq.az xarici KİV-ə istinadən xəbər verir ki, görüntülər qlobal istiləşmənin buzlaqlara təsirini bir daha gündəmə gətirib.

Qrenlandiya dünyanın ikinci ən böyük buz təbəqəsinə malikdir və iqlim dəyişikliyinin təsirlərinin ən sürətlə müşahidə olunduğu bölgələrdən biri hesab edilir. Alimlərin məlumatına görə, buz təbəqəsi 1996-cı ildən etibarən davamlı kütlə itkisi yaşayır və 1986-cı ildən bəri təxminən 6 trilyon ton buz ərimə nəticəsində itirilib.

Mütəxəssislər son illərdə həddindən artıq ərimə hadisələrinin daha tez-tez baş verdiyini bildirirlər. Qeyd olunur ki, 1990-cı ildən bəri intensiv ərimənin müşahidə olunduğu ərazilərin sahəsi hər on ildə orta hesabla 2,8 milyon kvadrat kilometr artıb, ərimə nəticəsində yaranan suyun həcmi isə altı dəfədən çox yüksəlib.

Ekspertlərin fikrincə, bu proses dəniz səviyyəsinin qalxması riskini artırmaqla yanaşı, okean axınlarına və Arktika ekosisteminə də ciddi təsir göstərir.

İlulissat yaxınlığında qeydə alınan son görüntülərdə nəhəng aysberqin saniyələr ərzində parçalanaraq dənizə çökdüyü əks olunub. Alimlər xəbərdarlıq edirlər ki, Qrenlandiyada buzlaqların əriməsi bu templə davam edərsə, əsrin sonunadək dünya okeanında suyun səviyyəsi əhəmiyyətli dərəcədə yüksələ bilər.

Şəbnəm Mehdizadə