Qəhvənin ürəyə faydası dəmlənmə üsulundan asılı imiş

Amerika Ürək Assosiasiyasının yayımladığı yeni elmi hesabat qəhvənin ürək sağlamlığına təsiri ilə bağlı mühüm məqamları ortaya qoyub.

E-huquq.az xəbər verir ki, araşdırmaya əsasən, gündə beş fincana qədər qəhvə istehlakı insult, şəkərli diabet və ürək çatışmazlığı riskini azalda bilər. Lakin mütəxəssislər bildirirlər ki, bu faydalı təsirin yaranmasında qəhvənin hazırlanma üsulu və məhsulun növü mühüm rol oynayır.

İllərdir davam edən ziddiyyətli tövsiyələrdən sonra yayımlanan genişmiqyaslı araşdırma kofeinlə ürək-damar sağlamlığı arasındakı əlaqəyə aydınlıq gətirib.

Amerika Ürək Assosiasiyası uzun müddət ürək xəstələrinə stimullaşdırıcı maddələrdən uzaq durmağı tövsiyə edən yanaşmaları yenidən qiymətləndirib. Yeni məlumatlar göstərir ki, nizamlı və ölçülü qəhvə istehlakı hətta ürək ritm pozğunluğu müalicəsi almış şəxslərdə belə xəstəliyin təkrarlanma riskini azalda bilər.

Araşdırmada həmçinin müntəzəm qəhvə qəbulunun 2-ci tip diabetin yaranma ehtimalını da əhəmiyyətli dərəcədə aşağı sala biləcəyi müəyyən edilib.

Mütəxəssislər qeyd edirlər ki, qəhvənin sağlamlığa müsbət təsiri əsasən onun hazırlanma üsulu ilə bağlıdır. Araşdırmaçılar ürək sağlamlığını dəstəkləyən təsirin əsasən kağız filtrdən istifadə edilərək dəmlənən qəhvə və hazır qəhvə növləri üçün keçərli olduğunu vurğulayırlar.

Fransız presi, espresso və türk qəhvəsi kimi süzülmədən hazırlanan qəhvə növlərində isə qəhvə dənəsində təbii şəkildə olan kafestol maddəsi qorunub saxlanılır. Bu maddə uzun müddət ərzində damarlarda yığıla bilən "pis" xolesterinin səviyyəsini artıra bilər.

Buna görə də qəhvənin hazırlanma üsulu onun faydası ilə mümkün zərəri arasındakı əsas amillərdən biri hesab olunur.

Mütəxəssislər bildirirlər ki, təbii qəhvənin faydaları yüksək konsentrasiyalı süni kofein tərkibli məhsullara aid deyil. Enerji içkiləri, kofein həbləri və xüsusi kofein əlavələri hətta sağlam insanlarda belə təzyiqin qəfil yüksəlməsinə və ürək ritminin pozulmasına səbəb ola bilər.

Xüsusilə yüksək miqdarda enerji içkisi qəbulunun həyati təhlükəli ritm pozğunluqlarına, hətta ürək dayanmasına gətirib çıxara biləcəyi barədə xəbərdarlıq edilir.

Araşdırmaya görə, qəhvənin orqanizmə təsiri insandan insana dəyişir. Qaraciyərdə kofeini parçalayan genetik fermentlərin müxtəlifliyi onun bədəndə nə qədər sürətlə emal olunmasına təsir göstərir.

Bəzi insanlar gündə beş fincana qədər qəhvəni problemsiz qəbul edə bildiyi halda, digərlərində daha az miqdarda kofein belə yuxu pozuntusu və qan təzyiqində dəyişikliklər yarada bilər.

Mütəxəssislər ürək xəstəliyi və ya xroniki sağlamlıq problemi olan şəxslərə gündəlik kofein qəbulunu həkimlə məsləhətləşərək müəyyən etməyi tövsiyə edirlər.

Şəbnəm Mehdizadə