ÜST: Konqoda Ebola xəstələrinin real sayı rəsmi rəqəmlərdən iki dəfədən çox ola bilər

Ümumdünya Səhiyyə Təşkilatının (ÜST) Baş direktoru Tedros Adhanom Qebreyesus Konqo Demokratik Respublikasında (KDR) davam edən Ebola epidemiyası ilə bağlı xəbərdarlıq edib.

E-huquq.az-ın məlumatına görə, o bildirib ki, bölgədə davam edən silahlı münaqişələr səbəbindən xəstəliyə yoluxanların real sayı rəsmi statistikadan iki dəfədən çox ola bilər.

Qebreyesus sosial media hesabında paylaşdığı açıqlamada qeyd edib ki, may ayında elan olunan epidemiyanın başlanmasından indiyədək 2 500-dən çox yoluxma qeydə alınıb. Onun sözlərinə görə, indiyədək 1 000-dən çox insan həyatını itirib, 500-dən artıq xəstə isə sağalıb.

ÜST rəhbəri vurğulayıb ki, ölüm hallarının əksəriyyəti müalicə mərkəzlərində deyil, birbaşa yaşayış məntəqələrində baş verir.

Qebreyesus bildirib ki, epidemiya ilə mübarizədə əsas maneə təhlükəsizlik problemidir. Onun sözlərinə görə, bölgələrdə davam edən silahlı toqquşmalar və qeyri-sabit vəziyyət səhiyyə qruplarının zərərçəkmiş ərazilərə çıxışını məhdudlaşdırır. Bu səbəbdən də Ebola virusuna yoluxanların faktiki sayının rəsmi rəqəmlərdən iki dəfədən çox olduğu ehtimal edilir.

Baş direktor əlavə edib ki, təmasda olmuş şəxslərin təxminən 80 faizi müəyyən edilərək izlənilsə də, bütün ərazilərə giriş mümkün olmadığından bəzi xəstələri vaxtında aşkarlamaq və tibbi müdaxilə göstərmək mümkün olmur. O qeyd edib ki, əldə olunan müəyyən irəliləyişlərə baxmayaraq, virusun yayılma sürəti görülən tədbirləri üstələyir.

Qebreyesusun sözlərinə görə, hazırda əsas prioritet İturi bölgəsində yoluxma hallarını azaltmaq və epidemiyanın yayıldığı yeni əyalətlərdə tibbi imkanları qısa müddətdə gücləndirməkdir. O, humanitar yardımın maneəsiz çatdırılması üçün təcili humanitar dəhlizin açılmasının və bunun üçün atəşkəsə yönəlmiş siyasi addımların vacibliyini vurğulayıb.

ÜST rəhbəri sonda bildirib ki, Ebola epidemiyası ilə mübarizə yalnız texniki tədbirlərlə mümkün deyil və siyasi həll yollarına da ehtiyac var.

"Konqo Demokratik Respublikasının əhalisi bu epidemiya ilə təkbaşına mübarizə apara bilməz. Onların beynəlxalq ictimaiyyətin davamlı dəstəyinə və hər şeydən əvvəl sülhə ehtiyacı var", - deyə Tedros Adhanom Qebreyesus bildirib.

Şəbnəm Mehdizadə