Putin əcnəbilərin deportasiyasının əsaslarını genişləndirən qanun imzaladı

Rusiya Prezidenti Vladimir Putin əcnəbilərin deportasiya ilə üzləşəcəyi inzibati xətaların siyahısını genişləndirən qanun imzalayıb.

E-huquq.az xəbər verir ki, sənəd hüquqi aktlar portalında dərc edilib.

Qanuna əsasən, İnzibati Xətalar Məcəlləsində deportasiyanı nəzərdə tutan maddələrin sayı 22-dən 45-ə qədər artırılıb. Xüsusilə, deportasiya aşağıdakılar üçün tətbiq olunacaq:

- milliyyətinə, dininə və cinsinə görə ayrı-seçkilik (hazırda yalnız cərimə);

- sərhədi qoruyan hərbi qulluqçunun və ya polis məmurunun əmrinə tabe olmama;

- xırda xuliqanlıq;

- mitinqlərdə qanun pozuntuları;

- yol tıxanması;

- narkotik istifadəsi;

- qadağan olunmuş simvolların təbliği;

- Rusiya Silahlı Qüvvələrinin nüfuzdan salınması;

- sanksiyalara çağırış.

Siyahıya ayrıca olaraq xarici agentlərin fəaliyyətini və fövqəladə vəziyyəti tənzimləyən qaydaların pozulması, eləcə də arzuolunmaz təşkilatlarda iştirak daxildir.

Qanuna əsasən, ölkəyə giriş qaydalarının pozulması və qanunsuz əmək fəaliyyəti üçün cərimələr artırılır (minimum cərimə 2000-dən 4000 rubla qədər). Qanunu pozanlara deportasiyadan yayınmaq üçün ailə vəziyyətini və ya yaşayış müddətini göstərmək də qadağan olunacaq.

Sənəd rəsmi dərc edildikdən 90 gün sonra qüvvəyə minəcək.