Tbilisidə məhkəmə binasını yandırmağa çalışan müxalifət lideri saxlanıldı

Gürcüstanın müxalif “Güclü Gürcüstan” koalisiyasının liderlərindən biri Aleko Elisaşvili Tbilisi Şəhər Məhkəməsinin dəftərxana binasını yandırmağa cəhdə görə saxlanılıb.

E-huquq.az xəbər verir ki, bu barədə Gürcüstanın Daxili İşlər Nazirliyindən bildirilib.

İstintaqla müəyyən edilib ki, bu gün sübh tezdən Elisaşvili dəftərxana binasının ön fasadanın pəncərəsini çəkiclə sındırıb, içəri daxil olub və ətrafa, o cümlədən dəftərxana ləvazimatları, avadanlıqlar və sənədlərə benzin tökərək binanı yandırmağa cəhd edib.

Müxalifətçi hadisə yerində Məhkəmə İcraçıları Xidmətinin əməkdaşları tərəfindən saxlanılıb. Elisaşvili üzərində olan odlu silahdan istifadə edərək müqavimət göstərib və fiziki təzyiq tətbiq edib. Onun müqavimətinə baxmayaraq, məhkəmə icraçıları Elisaşvilini yerindəcə həbs ediblər.

Qarşıdurma zamanı xəsarətlər alan Xidmət əməkdaşlarından biri xəstəxanaya çatdırılıb. Elisaşvili də saxlanılarkən müqavimət göstərdiyinə görə xəsarətlər alıb. Polis cinayətdə istifadə olunan odlu silahı müsadirə edib.

Faktla bağlı istintaq tədbirləri aparılır.

Mənbə: APA