Sumqayıtda tonqalda baş berən partlayış zamanı xəsarət alanların son durumu açıqlandı - YENİLƏNDİ

Sumqayıt şəhəri, 7, 8 və 12-ci məhəllələrin kəsişməsində tonqal yandırılan zaman partlayış baş verməsi səbəbilə Sumqayıt Tibb Mərkəzinin nəzdindəki Uşaq Xəstəxanasında 2 nəfərin müalicəsi davam etdirilir.

E-huquq.az xəbər verir ki, dəqiqləşdirilməmiş kəllədaxili travma diaqnozu təyin olunan 2013-cü il təvəllüdlü şəxsin (qadın cinsli) vəziyyəti orta ağır qiymətləndirilir.

Qarının küt travması diaqnozu təyin olunan 2013-cü il təvəllüdlü şəxsin (kişi cinsli) vəziyyəti isə stabil qiymətləndirilir.

Qeyd edək ki, bilək və əlin dəqiqləşdirilməmiş termiki yanığı diaqnozu təyin edilən 2014-cü il təvəllüdlü şəxs (kişi cinsli) daha ixtisaslı tibbi xidmət almaq üçün Nərimanov Tibb Mərkəzinin nəzdində olan Yanıq Mərkəzinə təxliyə olunub.

***

10:58

Sumqayıt şəhərində tonqalda baş berən partlayış zamanı xəsarət alan şəxslərin kimliyi məlum olub.

E-huquq.az "Report"a istinadən xəbər verir ki, xəsarət alanlar Sumqayıt şəhər sakinləridir.

Xəsarət alanlar 2004-2018-ci il təvəllüdlü şəxslərdir:

2004-cü il təvəllüdlü Məmmədzadə Fatimə Telman qızı,

2006-cı il təvəllüdlü İsgəndərli Fatimə Camal qızı,

2015-ci il təvəllüdlü Bayramlı Nailə Saleh qızı,

2018-ci il təvəllüdlü Qasımov Aylin Rahid qızı,

2015-ci il təvəllüdlü Hüseynzadə İsa Taleh oğlu,

2014-cü il təvəllüdlü Təhməzli Ömər Rəşad oğlu,

2016-cı il təvəllüdlü Əliyeva Ayla Roman qızı,

2009-cu il təvəllüdlü Orucov Nicat Vüqar oğlu,

2013-cü il təvəllüdlü Əsədli Duyğu Nəriman qızı,

2013-cü il təvəllüdlü Həsənli Yusif Niyazi oğlu,

2008-ci il təvəllüdlü Məmmədova Aylin Ramin qızı xəsarət alıb.

***

21 mart, 23:56

Sumqayıt şəhərində bayram tonqalında baş verən partlayış nəticəsində xəsarət alanlarən sayı 11-ə çatıb.

Bu barədə e-huquq.az-a TƏBİB-dən bildirilib.

Qeyd edilib ki, 21.03.2026-cı il tarixində saat 21:10 radələrində Respublika Təcili və Təxirəsalınmaz Tibbi Yardım Mərkəzinə Sumqayıt şəhəri, 7, 8 və 12-ci məhəllələrin kəsişməsində bayram tonqalında güclü partlayış səbəbilə çağırış qeydə alınıb.

Məlumata görə, çağırış ünvanına 3 təcili tibbi yardım briqadası cəlb olunub.

"Təcili tibbi yardım briqadaları tərəfindən 5 uşaq Sumqayıt Tibb Mərkəzinin nəzdində olan Uşaq Xəstəxanasına hospitalizasiya olunub.

Eyni zamanda 4 nəfər Uşaq Xəstəxanasına, 2 nəfər isə Təcili Tibbi Yardım Xəstəxanasına hospitalizasiya olunub.

Onların hər birinə tüstüdən zəhərlənmə səbəbilə zəruri tibbi xidmətlər göstərilib.

Vəziyyəti qənaətbəxş qiymətləndirilən 7 nəfər ambulator müalicə üçün evə buraxılıb.

Hazırda 4 nəfərin müalicəsi davam etdirilir, vəziyyətləri stabildir", - deyə qeyd olunub.

***

22:54

Fövqəladə Hallar Nazirliyinin (FHN) "112" qaynar telefon xəttinə Sumqayıt şəhəri, 7, 8 və 12-ci məhəllələrin kəsişməsində tonqal yandırılan zaman partlayış baş verməsi barədə məlumat daxil olub.

Nazirliyin mətbuat xidmətindən e-huquq.az-a bildirilib ki, məlumatla əlaqədar dərhal FHN-in Dövlət Yanğından Mühafizə Xidmətinin qüvvələri əraziyə cəlb olunub.

Hadisə yerində əməliyyat şəraitinin ilkin qiymətləndirilməsi zamanı vətəndaşlar tərəfindən tonqalı benzinlə yandıran zaman ani partlayışın baş verdiyi müəyyən olunub.

Hadisə nəticəsində 8-i uşaq olmaqla ümumilikdə 10 nəfər xəsarət alıb.

FHN qüvvələri tərəfindən ərazidə müvafiq təhlükəsizlik tədbirləri görülüb, o cümlədən tonqalın ətrafa yayılmasının qarşısı alınıb.

Hadisə ilə əlaqədar aidiyyəti qurumlar tərəfindən araşdırma aparılır.