Perinatal Mərkəzdəki yanğınla bağlı məhkəmədə şahidlər ifadə verdi

Respublika Perinatal Mərkəzində 7 körpənin öldüyü yanğınla bağlı ittiham olunan direktor və şöbə rəislərinin cinayət işi üzrə məhkəmənin növbəti iclası keçirilib.

E-huquq.az xəbər verir ki, Bakı Ağır Cinayətlər Məhkəməsində hakim Leyla Əsgərova-Məmmədovanın sədrliyi ilə keçirilən prosesdə şahidlər dindirilib.

Şahid Leyla Abdullayeva hər 3 təqsirləndiriləni tanıdığını bildirib. O bildirib ki, Mərkəzdə Neonatoloq kimi fəaliyyət göstərib.

"Yanğın gecə saat 3 radələrində baş vermişdi. Mən ordinator otağında idim. Səs eşitdim və daha sonra yanğından xəbərdar oldum. Yanğını söndürməyə çalışırdıq. Mən su hazırlamışdım, əməkdaşlar yanğını söndürməyə çalışırdı. Yanğınsöndürən balonunu gətirməklərini istədim. Kim nəyi bacarırdı onu da edirdi. Bizə yanğınlarla bağlı təlim keçilmişdi. Yanğın baş verən zaman uşaqları küvəzdən birbaşa götürmək olmaz. Həmin otaqda 9 körpə olub. Onlardan 4-ü aparata qoşulmamışdı. Biz düşündük ki, uşaqları çıxarmadan yanğını söndürək, çünki uşaqları aparatdan ayırmaq olmazdı. Yanğını söndürməyə başladıq, lakin qara qatı duman qalxdı. Bu zaman işıqlar da söndü. Buna görə də bəzi körpələri çıxara bilmədik. Şöbədə ümumilikdə 37 uşaq var idi. Orada işlədiyim zaman bəzi elektrik yuvaları açıq idi və bu, təhlükəli idi”, - L. Abdullayeva bildirib.

Şahid Elşad Bayramov hadisədən 6 ay öncə öz ərizəsi ilə işdən çıxdığını bildirib.

"Təxminən 1 il 5 ay təsərrüfat bölməsində işləmişəm. Yanğının söndürülməsi barədə bizə təlimlər keçirilirdi. Yoxlamalar zamanı ciddi pozuntular aşkar edilməmişdi. Pozuntuların aradan qaldırılması üçün Mərkəz rəhbərinə müraciət etmişdim” - deyə şahid bildirib.

Məhkəmənin növbəti iclası 22 oktyabr tarixinə təyin edilib.

Qeyd edək ki, 2024-cü il yanvarın 9-da "Respublika Perinatal Mərkəzi" PHŞ-nin inzibati binasında yanğın baş verib.

Yanğınla bağlı Baş Prokurorluqda Cinayət Məcəlləsinin 225.3 (yanğın təhlükəsizliyi qaydalarını pozma ehtiyatsızlıqdan iki və daha çox şəxsin ölümünə səbəb olduqda) və 314.3-cü (səhlənkarlıq iki və daha çox şəxsin ölümünə səbəb olduqda) maddələri ilə cinayət işi başlanaraq ibtidai istintaqın aparılması Baş Prokurorluğun İstintaq idarəsinə tapşırılıb.

İstintaqla müəyyən olunub ki, Mərkəzin Anesteziologiya, reanimasiya və intensiv terapiya şöbəsinin Yenidoğulmuşların intensiv terapiya bölməsinin yerləşdiyi dördüncü mərtəbədəki palatasında baş vermiş yanğın nəticəsində 7 yenidoğulmuş ölüb, 4 nəfər xəsarət alıb, müəssisəyə isə ümumilikdə 361 min manat məbləğində maddi ziyan vurulub.

Bundan başqa, Mehriban Abasquliyevanın 27 dekabr 2022-ci il tarixdə Mərkəzin direktoru təyin edilməsindən sonra müəssisənin tibbi təminat resursları və potensialını nəzərə almadan xəstə qəbulu sayını iki dəfəyədək artırması nəticəsində müəssisənin elektrik təsərrüfatının artıq yüklənərək sonda yanğına səbəb olmasına əsaslı şübhələr müəyyən edilib.

Eyni zamanda istintaqla, Fövqəladə Hallar Nazirliyi tərəfindən Mərkəzdə yoxlamalar aparılaraq yanğın təhlükəsizliyi qaydaları, xüsusən də, mövcud avtomatik yanğın xəbərverici siqnalizasiya qurğusunun nasazlığı, daxili yanğın su kranlarının işlək olmaması və elektrik təsərrüfatında nöqsanların olması Mərkəzin rəhbərliyinə bildirilsə də, direktor və Mərkəzin Anesteziologiya, reanimasiya və intensiv terapeya şöbəsinin müdiri Hamlet Mustafayev və Dəstək Xidmətləri şöbəsinin müdiri Elnur Əhmədlinin nöqsanları aradan qaldırmamalarına əsaslı şübhələr müəyyən edilib.

Mərkəzin direktoru vəzifəsində işləmiş Mehriban Abasquliyeva Cinayət Məcəlləsinin 308.2 (ağır nəticələrə səbəb olan vəzifə səlahiyyətlərindən sui-istifadə) və 225.3-cü (yanğın təhlükəsizliyi qaydalarını pozma ehtiyatsızlıqdan iki və daha çox şəxsin ölümünə səbəb olduqda) maddələri, həmin mərkəzin şöbə rəisləri vəzifəsində işləmiş Hamlet Mustafayev və Elnur Əhmədli isə Cinayət Məcəlləsinin 225.3-cü maddəsi ilə təqsirləndirilən şəxs qismində cəlb edilərək onlara həmin maddələrlə nəzərdə tutulan ittiham elan edilib.


Xatırladaq ki, cinayət işi üzrə zərərçəkmiş qismində "Respublika Perinatal Mərkəzi", Elçin Gülmalı oğlu Nəcəfov, Vaqif İntiqam Hacıyev, Aynurə Qalib qızı Əhmədova, Gülbahar Zülfüqarova zərərçəkmiş qismində tanınıb.

Humay Eminqızı