Özünü Ədliyyə Nazirliyinin əməkdaşı kimi təqdim edərək 150 min manatı ələ keçirdi - MƏHKƏMƏ

Külli miqdarda dələduzluqda təqsirləndirilən Abbas Hətəmovun cinayət işi üzrə məhkəmənin yekun iclası baş tutub.

E-huquq.az xəbər verir ki, Bakı Ağır Cinayətlər Məhkəməsinin hakimi Telman Hüseynovun sədrliyi ilə keçirilən prosesdə dövlət ittihamçısı çıxış edib.

O, H. Abbasın 7 il 6 ay müddətinə azadlıqdan məhrum edilməsini təklif edib.

Vəkillərin çıxışından sonra təqsirləndirilən şəxs özünü təqsirli bilmədiyini və ona bəraət verilməyini məhkəmədən xahiş edib.

Hökmə əsasən, A.Hətəmov 5 il müddətinə azadlıqdan məhrum edilib.

Qeyd edək ki, təqsirləndirilən A.Hətəmov 2020-ci ildə də dələduzluğa görə 3 il müddətinə azadlıqdan məhrum edilib.

İttihama görə A.Hətəmov özünü Ədliyyə Nazirliyinin əməkdaşı kimi təqdim edərək Hacıqabul rayonunda vətəndaşlardan 21 min manat pul alıb.

A.Hətəmov 2022-ci ilin oktyabr ayında Azər Babaşovun 6700 manatlıq xırdabuynuzlu heyvanlarını dələduzluq yolu ilə ələ keçirib.

Bundan başqa, 2023-ci ilin dekabr ayında Səxavət Məmmədovun oğlunu 22 min manata Penitensiar Xidmətə işə düzəltməyə söz verərək həmin məbləği sonuncudan alıb.

Həmçinin A.Hətəmov Gültəkin Rəhimovadan 67,2 kvadrat metr mənzil üçün 2024-cü il avqustun 13-də 101 min 500 manat pulu alaraq qadına qarşı külli miqdarda dələduzluq edib.

Ona qarşı Cinayət Məcəlləsinin 178.3.2-ci (külli miqdarda dələduzluq etmə) maddəsi ilə ittiham irəli sürülüb.

Humay Eminqızı