Bakıda dələduzluqda təqsirləndirilən müəllimlərə hökm oxundu

Bakıda dələduzluqda təqsirləndirilən orta məktəb müəllimləri -Təranə Cəfərova, Tahirə Şamilova və tibb işçisi Məlahət Mustafayevanın cinayət işi üzrə məhkəmə prosesi baş tutub.

E-huquq.az xəbər verir ki, Bakı Ağır Cinayətlər Məhkəməsində hakim Telman Hüseynovin sədrilyi ilə keçirilən prosesdə hökm oxunub.

Hökmə əsasən, Məlahət Mustafayeva 5 il azadlıqdan məhrum edilib. O məhkəmə zalında həbs edilib. Təranə Cəfərova və Tahirə Şamilova isə 5 il şərti azadlıqdan məhrum edilib.

İttihama görə, Binə qəsəbəsində yerləşən 149 saylı orta məktəbin müəllimi T.Cəfərova digər təqsirləndirilən şəxslərlə cinayət əlaqəsinə girib, bir qrup müəllimə qarşı dələduzluq ediblər. Belə ki, Təranə Cəfərova zərərçəkmiş şəxslərə T.Şamilova və M.Mustafayevanın Elm və Təhsil Nazirliyində yüksək vəzifədə işləyən tanışlarının olduğunu deyib, onların inamını qazanmağa nail olub. Müəllimlərin işə qəbul edilməsinə, yüksək bal toplamalarına dair sertifikasiya verməyə, bəzi müəllimlərin iş yerinin dəyişdirilməsinə, ali məktəbə məzun qəbul etdirə bilmələrinə dair yalan vədlər veriblər.

İstintaq sənədlərində göstərilib ki, T.Cəfərova Azərbaycan dili və ədəbiyyat müəllimi Sona Rəhimlini 88 saylı orta məktəbə işə qəbul etdirəcəklərini söyləyib. Digər təqsirləndirilən T.Şamilova ilə birlikdə sövdələşərək bu işin düzəlməsi üçün zərərçəkmişdən 16 min manat istəyib. Əvvəl 10 min manatı, iş düzələndən sonra isə qalan 6 min manatı almağa razılaşıblar.

Onlar 2024-cü ilin mayında zərərçəkmişdən 10 min manat alıblar. Lakin vədlərinə əməl etməyiblər.

Bundan başqa, təqsirləndirilən şəxslər Binə qəsəbəsində digər Azərbaycan dili və ədəbiyyat müəllimi Nuridə Hüseynovanı həmin qəsəbədə orta məktəblərdən birinə işə düzəldəcəklərinə dair yalan vəd veriblər. N.Hüseynova onların təklifini həyat yoldaşı Əşrəf Hüseynova deyib. Ər-arvad məsləhətləşdikdən sonra təqsirləndirilən şəxslərlə razılaşıblar, işin düzəlməsi üçün 16 min manat veriblər.

Daha sonra təqsirləndirilənlər Rus dili müəllimi Ayna Bayramova ilə onu 149 saylı orta məktəbə işə qəbul etdirəcəkləri barədə razılığa gəliblər. Ondan 2024-cü ilin iyun ayında 15 min manat alıblar.

Bundan əlavə, onlar Texnologiya müəllimi Şirin Qafarovanın işlə təmin olunması üçün bacısı Günayla birlikdə görüşüblər. Razılığa gəldikdən sonra bacılardan 10 min manat alıblar. Tarix müəllimi Nəsimi Kərimovdan isə Binə qəsəbəsində olan orta məktəbdəki iş yerindən yaşayış yeri üzrə Xətai rayonunda yerləşən orta məktəblərdən birinə dəyişdiriləcəyi adı ilə 12 min manat alıblar.

İttihamda göstərilib ki, daha bir neçə nəfəri eyni üsulla aldadılıb. Müttəhimlər bir neçə nəfəri isə ali məktəbə qəbul etdirmək adı ilə dələduzluq ediblər.

Cinayət işi üzrə ziyanın ümumi məbləği 160 min 500 manat həcmindədir.

İstintaq orqanı tərəfindən təqsirləndirilən şəxslərin hər biri barəsində Cinayət Məcəlləsinin 178.3.2-ci (külli miqdarda ziyan vurmaqla dələduzluq törətmək) maddəsi ilə ittiham elan olunub.

Humay Eminqızı