Bu gün Ali Məhkəmədə ölümlə nəticələnən yol-nəqliyyat hadisəsi törətməkdə təqsirləndirilən Namiq Yadigarovun barəsində məhkəmə qərarından prokurorluğun verdiyi kasssasiya protestinə baxılıb.
Bu barədə e-huquq.az-a vəkil Əli Hüseynov məlumat verib. O qeyd edib ki, hakim İlqar Qılıcovun sədrliyi ilə keçirilən prosesdə qərar elan edilib. Qərara əsasən, prokurorun protesti təmin edilməyib, bəraət qərarı qüvvədə saxlanılıb.
Xatırladaq ki, hadisə ötən il iyulun 20-də Quba-Xaçmaz yolunda baş verib. Belə ki, N. Yadigarov yolu keçmək istəyən piyada 1956-cı il təvəllüdlü Şakir Ağarzayevi idarə etdiyi "Kia Betta" markalı avtomobillə vurub. Nəticədə sonuncu aldığı xəsarətlərdən hadisə yerində dünyasını dəyişib. Quba Rayon Məhkəməsi N. Yadigarovun günahsız olduğu qənaətinə gələrək, ona bəraət verib.
.jpg)
