Azərbaycan üzrə vahid seçicilər siyahısının tərtib olunması prosesi başa çatır

Azərbaycan Respublikası üzrə vahid seçicilər siyahısının tərtib olunması prosesi başa çatır.

E-huquq.az-ın xəbərinə görə, Seçki Məcəlləsinin tələblərinə əsasən, hər il məntəqə seçki komissiyaları məntəqə üzrə tərtib edilmiş seçici siyahılarını fevralın 5-dən gec olmayaraq müvafiq dairə seçki komissiyalarına təqdim etməlidir.

Dairə seçki komissiyaları isə müvafiq seçki dairələri üzrə ilkin seçici siyahılarını aprelin 5-dək Mərkəzi Seçki Komissiyasına təhvil verməlidir. Mərkəzi Seçki Komissiyası da öz növbəsində vahid seçicilər siyahısının ölkə üzrə tərtib edilməsini həyata keçirməlidir.

Bu prosesə ən gec may ayının sonuna qədər yekun vurulmalı və ölkə üzrə yenidən tərtib olunmuş vahid seçicilər siyahısı Mərkəzi Seçki Komissiyasının rəsmi internet səhifəsində yerləşdirilməlidir.

Sabah Mərkəzi Seçki Komissiyasının iclası keçiriləcək və Azərbaycan Respublikası üzrə vahid seçicilər siyahısının tərtib olunması prosesinə yekun vurulacaq.