Son 3 ildə Rəyasət Heyətinin iclaslarında 1600-dən çox qərar qəbul edilib

"Son 3 ildə Rəyasət Heyətinin iclaslarında 1600-dən çox qərar qəbul edilib".

E-huquq.az xəbər verir ki, bunu Vəkillər Kollegiyasının sədri Anar Bağırov deyib.

O bildirib ki, son 3 il ərzində Rəyasət Heyətinin 62 iclası keçirilib: "Bu iclaslarda vəkilliyə qəbulla bağlı ixtisas imtahanlarını və icbari təlimi uğurla başa vuran vəkilliyə namizədlərin andiçmə mərasimləri keçirilib, Vəkillərin İntizam Komissiyasının rəylərinə baxılıb, bəzi vəkillərin dövlət qulluğuna qəbul olunması ilə əlaqədar vəkillik fəaliyyətlərinin dayandırılması, onların mükafatlandırılması, öz ərizələri ilə vəkillik fəaliyyətinə xitam verilməsi, müəyyən müddətdə üzvlük haqqından azad olunması, maddi yardımın edilməsi, başqa vəkil qurumlarına keçməsi ilə bağlı müraciətlər, habelə Rəyasət Heyətinin səlahiyyətləri çərçivəsində digər məsələlər müzakirə olunub".

A.Bağırovun sözlərinə görə, qeyd olunan 3 il ərzində Kollegiyanın aparatına 15 mindən çox müraciət daxil olub, həmçinin 2 yeni şöbə – Qəbul şöbəsi, eləcə də Monitorinq və ümumiləşdirmə şöbəsi yaradılıb.

Sədr vurğulayıb ki, qanunla Rəyasət Heyətinin üzərinə qoyulmuş vəzifələrdən biri də statistik hesabatların toplanılması və ümumiləşdirilməsidir: "Uzun illər bu hesabatların toplanılmasında problemlər mövcud olsa da, artıq bu məlumatlar tam qaydada toplanılıb".

Şəbnəm Mehdizadə