ABŞ-də bəzi texnologiya şirkətləri öz məlumat mərkəzlərini enerji ilə təmin etməyi öhdələrinə götürüblər

ABŞ-da fəaliyyət göstərən böyük texnologiya şirkətləri "Google", "Meta", "Amazon", "Microsoft", "OpenAI", "xAI" və "Oracle" süni intellekt məlumat mərkəzlərinin enerji tələbatını ödəməyi öhdələrinə götürüblər.

E-huquq.az xarici KİV-ə istinadən xəbər verir ki, ABŞ Prezidenti Donald Tramp Ağ Evdə keçirilən dəyirmi masa görüşündə Energetika Naziri Kris Rayt və texnologiya şirkətlərinin rəhbərləri ilə görüşüb.

Tramp görüşdəki çıxışında milyonlarla amerikalı üçün elektrik enerjisi xərclərini əhəmiyyətli dərəcədə azaltmağa kömək edəcək "Ödəyicilərin Müdafiəsi Andı" çərçivəsində tarixi bir imza üçün görüşdüklərini bildirib.

Tramp çıxışında qeyd edib ki, şirkətlər süni intellekt layihələri üçün tələb olunan əlavə elektrik enerjisini təmin edəcək və beləliklə, amerikalı istehlakçılar elektrik xərclərinin artımından qorunacaqlar. O, beş əsas öhdəlik olduğunu vurğulayıb:

Belə ki, şirkətlər süni intellekt layihələri üçün lazım olan bütün enerjini təmin edəcək və mümkün olduqda yeni elektrik stansiyaları tikərək şəbəkə gücünü artıracaqlar. Mövcud elektrik paylama infrastrukturu üçün əlavə investisiyaların xərclərini şirkətlər ödəyəcək. Yeni enerji investisiyalarının xərcləri üçün kommunal xidmət şirkətləri ilə tarif strukturlarında razılıq əldə ediləcək. Şirkətlər fəaliyyət göstərdikləri yerli icmalara investisiya qoyacaq, işçi qüvvəsinin inkişafı proqramlarını təmin edəcək və yeni iş yerləri yaradacaqlar. Lazım olduqda şirkətlər yerli şəbəkələrə ehtiyat enerji təmin etmək üçün infrastrukturlarından istifadə edəcəklər.

Görüşün sonunda Tramp bəyanatı imzalayaraq texnologiya nəhənglərinin öhdəliklərini təsdiqləyib.

Eyni zamanda "Google", "Meta", "Amazon", "Microsoft", "OpenAI", "xAI" və "Oracle" rəhbərləri də tədbirdə öhdəliklərini açıqlayıblar.

Şəbnəm Mehdizadə