Bu asteroid 3 il sonra Yer kürəsinə maksimum şəkildə yaxınlaşacaq

"99942 Apophis" asteroidi 2029-cu ildə Yer kürəsinə maksimum şəkildə yaxınlaşacaq.

E-huquq.az xəbər verir ki, eni təxminən 340 metr olan bu nəhəng asteroid, 13 aprel 2029-cu il cümə günü Yerə 32.000 kilometr məsafədən yaxınlaşacaq. Bu keçid, Yerdən təxminən 36.000 kilometr yüksəklikdə olan hər hansı bir geostasionar peykdən daha yaxın olacaq.

Bu nadir hadisə bir neçə min ildən bir baş verir və Şərq yarımkürəsindəki müşahidəçilər asteroidi teleskopa ehtiyac olmadan adi gözlə görə biləcəklər.

Dəqiq orbital hesablamalar göstərib ki, asteroid ən azı növbəti 100 il ərzində Yer üçün toqquşma təhlükəsi yaratmır. Astronomlar bu yaxın uçuşu asteroidin daxili quruluşunu və fiziki xüsusiyyətlərini öyrənmək üçün əla bir fürsət hesab edirlər.

NASA-nın OSIRIS-APEX və Avropa Kosmik Agentliyinin (ESA) Ramses missiyaları uçuşdan sonra asteroidlə əlaqəli ətraflı araşdırma aparmaq üçün onu izləyəcəklər.

Şəbnəm Mehdizadə