İran neft hasilatını kəskin şəkildə azaltmaq məcburiyyətində qalıb

İranın neft sənayesi öz tarixinin ən çətin dövrlərindən birini yaşayır.

E-huquq.az xarici KİV-ə istinadən xəbər verir ki, ABŞ-nin blokadası və sanksiyaları neft ixrac marşrutlarını tamamilə bağlayıb.

Bu vəziyyət ölkənin ən kritik neft terminalı olan Harq adasında ehtiyatların kritik həddə çatmasına səbəb olub.

Harq adası İran neftinin 90 faizindən çoxunu istehsal edir və təxminən 30 milyon barel anbar tutumuna malikdir.

Lakin Hörmüz boğazındakı blokadaya görə bu tutum son həddə yaxınlaşır. Kritik qırılma nöqtəsini gecikdirmək üçün 30 ildir istifadəsiz qalan ‘Naşa’ tankeri dənizdə anbar kimi istifadə olunur.

Dəniz analitikləri İranın cəmi 13 milyon barel anbar sahəsinə malik olduğunu bildiriblər.

Gündəlik xalis neft daxilolmalarının 1 milyon ilə 1,1 milyon barel arasında qiymətləndirilməsi ilə İranın anbar tutumunun 12-13 gün ərzində tam dolacağı proqnozlaşdırılır.

Bununla belə, hasilatın dayandırılması, xüsusən də su vurulan yataqlarda quyuların bərpa olunmaz zədələnməsinə və uzunmüddətli hasilat itkilərinə səbəb ola bilər.

Harq adası İran iqtisadiyyatının can damarı və onun əsas ixrac qapısıdır. “Naşa” tankerinin yerləşdirilməsi Tehranın sadəcə vaxt udmaq üçün müvəqqəti taktikası kimi qiymətləndirilir.

ABŞ-nin blokadası davam edərsə və ixrac kanalları bağlı qalsa, İran hökuməti ya hasilatı kəskin şəkildə azaltmalı, ya da ən strateji neft yataqlarına daimi ziyan vurma riski ilə üzləşməli olacaq.

Şəbnəm Mehdizadə