İngiltərədə kənd təsərrüfatı fəaliyyətinin dayandırıldığı ərazi müxtəlif canlılar üçün əlverişli məkana çevrilib

İngiltərədə təxminən 35 il əvvəl kənd təsərrüfatı fəaliyyətinin dayandırıldığı 150 hektarlıq ərazi zamanla zəngin biomüxtəlifliyə malik təbii yaşayış məkanına çevrilib.

E-huquq.az xarici KİV-ə istinadən xəbər verir ki, Bedfordşir qraflığında yerləşən "Strawberry Hill" ərazisi 1990-cı illərdən etibarən əsasən təbii proseslərin təsiri altında inkişaf edib. Bir vaxtlar əkin sahəsi kimi istifadə olunan ərazidə illər ərzində kollar, gənc ağaclar və çöl çiçəkləri yayılıb.

İnsan müdaxiləsinin azalması nəticəsində bölgə müxtəlif canlı növləri üçün əlverişli məkana çevrilib. Hazırda burada çoxsaylı quş növləri, yarasalar, kəpənəklər və müxtəlif bitki növləri yaşayır.

"Strawberry Hill" xüsusilə bülbüllər üçün mühüm yaşayış məkanı kimi tanınır. Məlumata görə, Bedfordşirdəki bülbül populyasiyasının təxminən yarısı məhz bu ərazidə məskunlaşıb. Bundan əlavə, burada müxtəlif silvilər, qumru və digər quş növlərinə də rast gəlinir.

2024-cü ildə aparılan araşdırmalar zamanı ərazidə 11 müxtəlif yarasa növü müəyyən edilib. Həmçinin nadir çöl çiçəklərinin bəzi növləri də qeydə alınıb.

Lakin uzun müddət bu təbii ərazinin daimi mühafizə statusu olmayıb. Torpaq sahibinin vəfatından sonra "Strawberry Hill"in satışa çıxarılması və ərazinin yenidən kənd təsərrüfatı məqsədləri üçün istifadəyə verilməsi ehtimalı ekoloqlar arasında narahatlıq yaradıb.

Bu səbəbdən Wildlife Trust for Beds, Cambs and Northants ərazinin qorunması üçün kampaniyaya başlayıb. Təşkilat “Strawberry Hill”i almaq məqsədilə 1,5 milyon funt-sterlinq toplamağı hədəfləyib.

Kampaniya ictimaiyyət tərəfindən dəstəklənib. 3800-dən çox insanın ianələri nəticəsində təxminən 500 min funt-sterlinq vəsait toplanıb. Qalan məbləğ isə iri ianəçilər, fondlar və müxtəlif təşkilatların dəstəyi ilə tamamlanıb.

Lazımi maliyyə vəsaiti toplandıqdan sonra ərazi “Wildlife Trust”ın mülkiyyətinə keçib və daimi mühafizə altına alınıb.

Təxminən 35 il əvvəl kənd təsərrüfatı sahəsi olan “Strawberry Hill” bu gün İngiltərənin qiymətli təbii yaşayış məkanlarından biri hesab olunur.

Humay Eminqızı