İranın yeraltı nüvə obyektində tikinti işləri sürətlənib

Vaşinqtonda yerləşən Strateji və Beynəlxalq Araşdırmalar Mərkəzinin (CSIS) yaydığı yeni peyk görüntülərinin təhlili İranın "Pickaxe" dağı yaxınlığındakı yeraltı nüvə obyektində tikinti işlərinin bu il əhəmiyyətli dərəcədə sürətləndiyini göstərib.

E-huquq.az xarici KİV-ə istinadən xəbər verir ki, Natanz nüvə kompleksi yaxınlığında, qranit dağ massivinin altında inşa edilən obyektin İranın nüvə proqramını mümkün hücumlardan qorumaq məqsədilə bunker kimi layihələndirildiyi ehtimal olunur. CSIS ekspertlərinin bildirdiyinə görə, 2026-cı il etibarilə obyekt fəal qazıntı mərhələsindən daxili tikinti işlərinə, tunel girişlərinin möhkəmləndirilməsinə və yol şəbəkəsinin salınmasına keçib. Bununla belə, obyektin hələ uranın zənginləşdirilməsi əməliyyatlarının həyata keçirilməsi üçün hazır olmadığı ehtimal edilir.

İsrail kəşfiyyatı İranın sentrifuqaları sözügedən obyektə köçürməyə cəhd göstərə biləcəyini ehtimal edir. ABŞ Prezidenti Donald Tramp isə obyektin istənilən vaxt hədəfə alına biləcəyini bildirib. Tramp bölgədəki fəaliyyətlərin yaxından izlənildiyini qeyd edərək, yaxın gələcəkdə obyektə zərbə endirilə biləcəyinə işarə edib. Məlumata görə, qranit massivinin altında yerləşən qurğu Pentaqonun arsenalındakı ən ağır qeyri-nüvə bombalarından biri hesab edilən GBU-57 MOP-a qarşı belə yüksək səviyyədə müdafiə təmin edə bilər.

Qeyd olunur ki, ABŞ ordusu raket sınaq poliqonlarında müvafiq əməliyyatlar həyata keçirir və dərin yeraltı obyektləri məhv etmək qabiliyyətinə malik yeni nəsil bunkerdağıdan bombaların hazırlanması istiqamətində iş aparır.

Şəbnəm Mehdizadə