Xəstənin ürəyində tikiş iynəsi tapıldı

Çində sidiyində qan olması şikayəti ilə xəstəxanaya müraciət edən 35 yaşlı əqli məhdudiyyətli şəxsin ürəyində 36 millimetr uzunluğunda tikiş iynəsi aşkarlanıb.

E-huquq.az xarici KİV-ə istinadən xəbər verir ki, həkimlər döş qəfəsinin rentgen müayinəsi zamanı ürək nahiyəsində şübhəli kölgə müşahidə ediblər.

Aparılan əlavə müayinələr zamanı xəstənin sidik kisəsində, qarın divarında və çanaq nahiyəsində də metal yad cisimlərin olduğu müəyyən edilib.

Məlum olub ki, ürəyi əhatə edən maye ilə dolu kisəni deşən 36 millimetrlik iynənin ucu sol mədəciyin boşluğuna qədər uzanıb.

Hunan Əyalət Xalq Xəstəxanasının həkimləri metal cismin yer dəyişdirməsi, toxumaların zədələnməsi və ya infeksiyaya səbəb olması riskini nəzərə alaraq iynənin cərrahi müdaxilə ilə çıxarılmasına qərar veriblər.

Sidik kisəsində aşkarlanan iynələrin üzərində isə daşlaşmış təbəqələrin əmələ gəldiyi görülüb. Həkimlər ilk olaraq ürəkdəki iynəni çıxarıb, sidik kisəsindəki iynələr isə daha sonra götürülüb.

İynələrin xəstənin bədəninə necə daxil olduğu dəqiq müəyyən edilməyib. Həkimlər bunun qəsdən özünə xəsarət yetirmə davranışı ilə bağlı ola biləcəyini bildiriblər.

Xəstənin tibbi tarixçəsində də oxşar hadisənin olduğu məlum olub. Belə ki, iki il əvvəl onun qarın nahiyəsindən iynəyə bənzər iki yad cisim çıxarılıb.

Şəbnəm Mehdizadə