Bakıda Türk məhkəmə ekspertizası şəbəkəsi təsis edilib - FOTO

Bakıda Türk Dövlətləri Təşkilatının (TDT) üzv dövlətlərinin məhkəmə ekspertizası qurumları arasında əməkdaşlığın gücləndirilməsini hədəfləyən Türk məhkəmə ekspertizası şəbəkəsinin təsis iclası keçirilib.

E-huquq.az TDT-nin saytına istinadən xəbər verir ki, iclas çərçivəsində Türk məhkəmə ekspertizası şəbəkəsinə dair anlaşma memorandumu TDT üzv dövlətlərinin müvafiq qurumlarının rəhbərləri tərəfindən imzalanıb.

Qeyd edilib ki, Türk məhkəmə ekspertizası şəbəkəsinin yaradılması TDT üzv dövlətləri arasında bu sahədə çoxtərəfli əməkdaşlığın gücləndirilməsi baxımından mühüm bir mərhələ hesab olunur.

Bu şəbəkə vasitəsilə məhkəmə ekspertizası qurumları arasında təcrübə və ən yaxşı tətbiqlərin paylaşılması, elmi tədqiqatlar, təlim proqramları və qarşılıqlı texniki dəstək də daxil olmaqla əməkdaşlığın səmərəliliyi və davamlılığı artırılacaqdır.

Bildirilib ki, iclas zamanı iştirakçılar, öz qurumlarının korporativ strukturu, mövcud fəaliyyətləri, potensial imkanları və həyata keçirilən layihələr barədə geniş təqdimatlar ediblər.