ABŞ-İsrail hücumları nəticəsində İranda 942 məktəb zərər görüb

ABŞ və İsrailin İrana hücumları nəticəsində 942 məktəb zərər görüb.

E-huquq.az xəbər verir ki, bu barədə İran hökumətinin sözçüsü Fatma Mohacerani məlumat verib.

Onun sözlərinə görə, hücumların hədəfi arasında mülki obyektlər, o cümlədən məktəblər və yaşayış binaları da olub.

Mohacerani, hücumlar zamanı 18 məktəbin tamamilə dağıldığını və digər məktəblərdə ciddi ziyan meydana gəldiyini qeyd edib. Zərər çəkmiş təhsil müəssisələrinin yenidən qurulmasının 2-3 ay ərzində başa çatmasının planlaşdırıldığını bildirib.

Əlavə olaraq, İran hökumətinin sözçüsü hücumların ümumilikdə 125 640 mülki vahidə, o cümlədən 100 000 yaşayış binası, 20 500 ticarət sahəsi və 339 səhiyyə mərkəzinə zərər verdiyini açıqlayıb.

Zərər çəkmiş mülki obyektlərin bərpası üçün təxminən 3 ilə 24 ay arasında bir müddət nəzərdə tutulur. Bundan əlavə, evləri zərər görən vətəndaşlara evlərini təmir etmək üçün mənzil krediti imkanları təqdim ediləcək.

Şəbnəm Mehdizadə