Bakıda Sinaqoqa hücuma hazırlıqda təqsirləndirilən şəxsin məhkəməsi keçirilib

Azərbaycanda terrora hazırlıqda təqsirləndirilən Abdulla Əliyevin barəsində Dövlət Təhlükəsizliyi Xidmətində (DTX) başlanılmış cinayət işi üzrə növbəti məhkəmə prosesi keçirilib.

E-huquq.az xəbər verir ki, Bakı Ağır Cinayətlər Məhkəməsində hakim Aygün Qurbanovanın sədrliyi ilə keçirilən prosesdə azyaşlı R.R. (şərti inisial) qanuni nümayəndəsinin iştirakı ilə ifadə verib.

O sözügedən mövzulara daxil edilməyənə kimi təqsirləndirilən şəxsi tanımadığını bildirib:

"Tanımadığım şəxs mənə yazıb öz istiqamətlərinə cəlb edirdi. Daha sonra Abdulla ilə də danışmağa başladım. Onların arasında yalnız sinaqoqa hücum barədə müzakirələr eşitmişəm. Dini qruplar barədə də müzakirələr eşitmişəm".

Daha sonra şahid ibtidai istintaq dövründə verdiyi ifadəsini təsdiq edib.

Şahid X.P. "Qış parkı" ərazisində təmizlik işçisi işlədiyini və Abdullanı həmin yerin yaxınlığında tutularkən gördüyünü deyib:

"Abdulla avtomobildə saxlanılıB, həmin avtomobildə bıçaq, balta, benzin və s. var idi. Hadisə yerində çəkiliş aparılarkən Abdulla tapılan əşyaların ona aid olduğunu deyib"

Məhkəmədə iştirak etməyən digər şahid H.Ə. avtomobilə baxış zamanı hal şahidi kimi iştirak edib. Onun ifadəsi elan edilib.

Daha sonra sənədlərin tədqiqi mərhələsinə keçilib.

Tədqiqdən sonra məhkəmə istintaqının yekunlaşması barədə qərar qəbul edilib.

Vəkil çıxış üçün vaxt istədiyinə görə məhkəmənin növbəti iclası 27 oktyabr tarixinə təyin edilib.

Qeyd edək ki, Abdulla Əliyev AR Cinayət Məcəlləsinin 28, 214.2.1 (terrorçuluq, qabaqcadan əlbir olan bir qrup şəxs, mütəşəkkil dəstə və ya cinayətkar birlik (cinayətkar təşkilat) tərəfindən törədildikdə), 28, 214.2.3 (terrorçuluq, odlu silahdan və silah qismində istifadə olunan predmetlərdən istifadə etməklə törədildikdə), 28, 214.2.6 (terrorçuluq, dini düşmənçilik, dini radikalizm və ya dini fanatizm zəminində törədildikdə), 218.2-ci (cinayətkar birlikdə (təşkilatda), habelə mütəşəkkil dəstələrin təşkilatçılarının, rəhbərlərinin və ya sair nümayəndələrinin birliyində iştirak etmə) maddələri ilə təqsirləndirilir. Məlumata görə, o, yəhudi sinaqoquna “Molotov kokteyli” ilə hücum plandığı zaman DTX-nin peşəkarlığı sayəsində cinayət başında saxlanılıb.

Azərbaycanın Sumqayıt şəhərində yaşayan və “İŞİD Xorasan” terror təşkilatına bağlılığı olması araşdırılan 18 yaşlı Abdulla Əliyev Bakı şəhərinin mərkəzində yerləşən "Bakı Dağ Yəhudiləri Sinaqoqu"na qarşı genişmiqyaslı terror aktı həyata keçirməyə hazırlaşıb.

Abdulla Əliyevin "Abu Radd" ləqəbli terror liderinə beyət edərək terrorçu fəaliyyətlərə başladığı bildirilib. Belə ki, 28 dekabr 2024-cü il tarixində Abdulla Əliyev “KİA” markalı avtomobili ilə Bakı şəhəri, Nəsimi rayonu, Əlimərdan bəy Topçubaşov küçəsində yerləşən yəhudi sinaqoquna yaxınlaşıb. O, avtomobilindən çıxardığı 3 ədəd “Molotov kokteyli” və digər silahlarla içəriyə daxil olmağa cəhd edib. Amma DTX əməkdaşları onu bu əməli gerçəkləşdirə bilmədən dayandırıblar.

Əməliyyat zamanı Abdulla Əliyevin üzərindən və avtomobilindən 1 ədəd balta, 2 bıçaq və yandırıcı-partlayıcı vasitələr aşkar edilərək götürülüb. Onun mobil telefonunda “SimpleX” ani mesajlaşma tətbiqi vasitəsilə yaratdığı “KHALIFATUL MUSLİMUN” adlı qrup aşkarlanıb. Təqsirləndirilən şəxsin “İŞİD Xorasan”ın liderlərindən biri ilə təmasda olduğu və təlimat aldığı da müəyyən edilib.

Humay Eminqızı