ABŞ-da saxlanılan 316 Cənubi Koreya vətəndaşı sərbəst buraxılıb

ABŞ Miqrasiya və Gömrük Mühafizəsi (ICE) tərəfindən "Hyundai-LG" şirkətinin idarə etdiyi fabrikdə keçirdiyi reyd zamanı saxlanılan 316 Cənubi Koreya vətəndaşı bir həftə sonra Corciyadakı Folkston Təcridxanasından buraxılıb.

E-huquq.az xəbər verir ki, bu barədə "Yonhap" agentliyi məlumat yayıb.

Məlumata görə, Cənubi Koreyalı işçilər təxminən 4,5 saatlıq məsafədə yerləşən Atlantadakı Hartsfield-Jackson Atlanta Beynəlxalq Hava Limanına avtobuslarla yola düşdülər.

Xatırladaq ki, ICE sentyabrın 5-də "Hyundai-LG" şirkətinin elektrik avtomobil akkumulyatorları zavodunda reyd keçirib.

Reyd zamanı 300-dən çoxu Cənubi Koreyalı olmaqla təxminən 475 nəfərin saxlanıldığı bildirilib.

Cənubi Koreya Xarici İşlər Nazirliyinin sözçüsü Li Ji-vunq, Seul hökumətinin hadisə ilə bağlı narahatlıq və kədərini ifadə edərək, "ABŞ-a sərmayə qoyan şirkətlərimizin iqtisadi fəaliyyətləri və vətəndaşlarımızın hüquq və mənafeləri haqsız olaraq pozulmamalıdır", - deyə bildirib.

Cənubi Koreya Prezident Aparatı saxlanılanların azad edilməsi ilə bağlı danışıqların yekunlaşdığını və inzibati prosedurlar tamamlandıqdan sonra vətəndaşların geri alınması üçün ABŞ-a xüsusi təyyarə göndəriləcəyini açıqlayıb.

ABŞ Daxili Təhlükəsizlik Naziri Kristi Noem də sözügedən şəxslərin qanuna uyğun olaraq deportasiya ediləcəyini bildirib.

Şəbnəm Mehdizadə