- 08:38
“Yarım sutka ərzində düşən yağıntının miqdarı yarım aylıq normaya bərabər olub. Qar örtüyünün hündürlüyü 22 sm təşkil edib”.
E-huquq.az xəbər verir ki, bunu Ekologiya və Təbii Sərvətlər Nazirliyinin Milli Hidrometeorologiya Xidmətinin rəisi Umayra Tağıyeva deyib.
O bildirib ki, gün ərzində yağıntılar davam edəcək: "Daha yüksək qar örtüyünü müşahidə edəcəyik. Proses qısa müddətlidir. Artıq axşam saatlarından başlayaraq ölkə ərazisində, o cümlədən Bakıda və Abşeron yarımadasında yağıntının kəsilməsi proqnozlaşdırılır”.
U.Tağıyevanın sözlərinə görə, şimal küləyinin sürəti rayonlarda 28, Bakıda 27 metrə qədər artıb. Axşama doğru isə güclü şimal-qərb küləyi arabir güclənən cənub-qərb küləyi ilə əvəz olunacaq.
"Yanvarın 15-də günün ikinci yarısında şimal-qərb küləyi yenidən güclənəcək. Yaxın günlərin hava şəraitini səciyyələndirsək, tez-tez güclü şimal küləyinin güclü cənub küləyi ilə əvəz olunacağı, atmosfer təzyiqinin də kəskin tərəddüdü gözlənilir. Belə hava şəraiti də meteohəssas insanlar üçün nisbətən əlverişsizdir", - deyə o qeyd edib.