NASA Ayda yeraltı mağaraları araşdıracaq

NASA gələcək Ay bazalarının yaradılması üçün əhəmiyyət daşıyan yeraltı mağaraları və lava tunellərini araşdırmaq məqsədilə GIMLI layihəsini həyata keçirir.

E-huquq.az xarici KİV-ə istinadən xəbər verir ki, tədqiqatın əsas obyektlərindən biri Yaponiyanın "Kaguya" peyki tərəfindən 2009-cu ildə aşkar edilən "Marius Hills" çökəkliyidir. Alimlər bu çökəkliyin qədim vulkanik fəaliyyət nəticəsində yaranmış geniş yeraltı tunellərlə əlaqəsini müəyyənləşdirməyə çalışacaqlar.

Araşdırmalar Ayın geoloji və vulkanik keçmişinin öyrənilməsinə, eləcə də gələcək astronavtlar üçün təhlükəsiz sığınacaqların müəyyənləşdirilməsinə kömək edə bilər. Yeraltı mağaralar Ay səthindəki kəskin temperatur dəyişikliklərindən, radiasiyadan və mikrometeoritlərdən təbii qorunma təmin edə bilər.

Planetar Elm İnstitutunun rəhbərlik etdiyi layihə "Honeybee Robotics" və Norveç Kosmik Agentliyi ilə əməkdaşlıq çərçivəsində hazırlanır. Tədqiqat zamanı yeraltı boşluqların ölçülərini və quruluşunu müəyyənləşdirmək üçün radarlar, seysmik sensorlar və qravimetrlərdən istifadə olunacaq.

Toplanacaq məlumatlar Ay mağaralarının gələcəkdə astronavtların yerləşdirilməsi və daimi Ay bazalarının qurulması üçün yararlı olub-olmadığını qiymətləndirməyə imkan verəcək.

Şəbnəm Mehdizadə