Vətəndaşa qarşı quldurluq etməkdə təqsirləndirilən keçmiş məhkumlara hökm oxundu

Vətəndaşa qarşı quldurluq etməkdə təqsirləndirilən keçmiş məhkumlar - Atamoğlan Abdalov və Taleh Mürsəlovun cinayət işi üzrə məhkəmə istintaqı yekunlaşıb.

E-huquq.az-ın məlumatına görə, bu barədə qərar Bakı Ağır Cinayətlər Məhkəməsinin hakimi Anar Sadıqovun sədrliyi ilə keçirilən prosesdə elan edilib.

Daha sonra dövlət ittihamçısı Tural Yaqubov ittiham nitqi ilə çıxış edərək məhkəmədən hər iki təqsirləndirilən şəxsin 10 il müddətinə azadlıqdan məhrum edilməsini istəyib.

Vəkillər müdafiə çıxışları etdikdən sonra təqsirləndirilən şəxslər son söz deyiblər.

Məhkəmə müşavirəyə gedib qayıtdıqdan sonra hökmü elan edib.

Hökmə əsasən, Atamoğlan Abdalov və Taleh Mürsəlovu 8 il 6 ay müddətinə azadlıqdan məhrum ediliblər.

Qeyd edək ki, hadisə ötən ilin dekabrında paytaxtın Nizami rayonu ərazisində qeydə alınıb. Belə ki, Abdalov Ağamoğlan Telman oğlu və Mürsəlov Taleh Elxan oğlu Koroğlu metrosunun yanında vətəndaş Gülbar Novruzova qarşı quldurluq hərəkəti ediblər.

Faktla bağlı hər iki şəxs Nizami rayon polis idarəsinin əməkdaşları tərəfindən şübhəli şəxs qismində saxlanılıblar.

Onlara qarşı Cinayət Məcəlləsinin 181.2.1-ci (bir qrup şəxs tərəfindən quldurluq etmə) maddəsi ilə ittiham irəli sürülüb.

Xatırladaq ki, hər iki təqsirləndirilən şəxs əvvəllər məhkumluq həyatı yaşayıb.

Orxan Rasifoğlu