Məhkəmə narkotik satmaqda təqsirləndirilən şəxsin cəzasını azaltdı

Sumqayıt Apellyasiya Məhkəməsi narkotik vasitələrin qanunsuz dövriyyəsində təqsirləndirilən Orxan Abdullayevin cəzasını azaldıb.

Bu barədə e-huquq.az-a vəkil Ruslan Mustafazadə məlumat verib.

Onun sözlərinə görə, hakim Azər İsmayılovun sədrliyi ilə keçirilən prosesdə birinci instansiya məhkəməsinin çıxardığı hökm dəyişdirilib.

Belə ki, O.Abdullayevin əməli Cinayət Məcəlləsinin 234.4.3-cü (Satış məqsədi ilə küllü miqdarda narkotik vasitə saxlama) maddəsindən həmin Məcəllənin 234.1-ci (Satış məqsədi olmadan qanunsuz olaraq narkotik vasitələri və ya psixotrop maddələri şəxsi istehlak miqdarından artıq miqdarda saxlama) maddəsinə tövsif edilib.

O, CM-nin 234.1-ci maddəsi ilə təqsirli bilinib və 8 il 6 ay müddətinə azadlıqdan məhrumetmə cəzası 2 il 9 aya endirilib.

Şəbnəm Mehdizadə